كوردى عربى ئینگلیزى
searh
 
Home لاپه‌ڕه‌ى سه‌ره‌كى > زانیاری > هه‌واڵ و ئاگاداریى
هه‌واڵ و ئاگاداریى

نووسه‌ر Web Admin به‌روار 05/05/2019
بابه‌ت فڕۆكەخانەی نێودەوڵەتی ئەربیل پێشوازی لە هێڵی ئاسمانی (Free Bird) بۆ گەشتی راستەوخۆ بۆ ئایندهۆڤن و کۆلۆن دەكات
ناوه‌رۆك ئەمڕۆ، هێڵی ئاسمانی فری بێرد (Free Bird) یەكەمین گەشتی ئاسمانی خۆی بۆ فڕۆكەخانەی نێودەوڵەتی ئەربیل ئەنجام دەدات. ئەم هێڵە ئاسمانییە گەشت لە/بۆ هەریەك لە شارەكانی ئایندهۆڤنی هۆڵەندی، کۆڵۆنی ئەڵمانی و ئەنتاڵیای توركی ئەنجام دەدات و بەمەش گەشتیار و هاووڵاتیان بژاردەی زیاتر و نرخی بلیتی فڕۆكەی هەرزانتریان دێتە بەردەم بۆ گەشت كردن.
گەشتەكانی شاری ئایندهۆڤنی هۆڵەندی لە كاتژمێر (15:25)ی رۆژانی یەك شەممەی هەموو هەفتەیەك ئەنجام دەدرێن. هەرچی گەشتەكانی شاری کۆڵۆنە ئەوا لە کاتژمێر (14:25)ی رۆژانی پێنج شەممەی هەموو هەفتەیەك ئەنجام دەدرێن. سەبارەت بە گەشتەكانی شاری ئەنتاڵیای تورکیش ئەوا لە کاتژمێر (18:15)ی رۆژانی سێ شەممە و کاتژمێر (20:00)ی رۆژانی شەممە ئەنجام دەدرێن.
بە هاتنی هێڵی ئاسمانی فری بێرد (Free Bird)، ژمارەی ئەو هێڵە ئاسمانییانەی كە گەشت لە/بۆ فڕۆكەخانەی نێودەوڵەتی ئەربیل ئەنجام دەدەن گەیشتە (21) هێڵی ئاسمانی كە گەشت بۆ (17) وڵات و (32) شوێنی جیاجیا ئەنجام دەدەن. لە وەرزی هاویندا، ژمارەی گەشتە ئاسمانییەكان لە هەفتەیەكدا لە فڕۆكەخانەی نێودەوڵەتی ئەربیل دەگاتە (396) گەشت، بە تێكڕای (56) گەشتی چوون لە رۆژێكدا.
لە مانگی ئازاری ئەمساڵدا، ژمارەی گەشتیارانی فڕۆكەخانە گەیشتە (171370) بە چوون و هاتنەوە.
لەم بارەیەوە، خاتوو تەلار فایەق، بەڕێوەبەری گشتی فڕۆكەخانە وتی: "ئێمە بە خۆشحاڵییەوە پێشوازی لە هێڵی ئاسمانی فری بێرد (Free Bird) دەكەین و هیوای سەركەوتنی بۆ دەخوازین لە گەشتەكانی بۆ هەریەك لە شارەكانی ئایندهۆڤن، کۆڵۆن و ئەنتاڵیا. فڕۆكەخانەی نێودەوڵەتی ئەربیل هەموو هەوڵی خۆی دەخاتە گەڕ لە كاركردن لەگەڵ ئەم هێڵە ئاسمانییە بەمەبستی سەرخستنی ئەم پڕۆسەیە. ئێمە چاوەڕوانی شەراكەتێكی درێژخایەنین لەگەڵ هێڵی ئاسمانی فری بێرد (Free Bird)".
خاتوو تەلار ئەوەشی ارگەیاند کە: "خشتەی گەشتە ئاسمانییەكانی ئەم هاوینە لە فڕۆكەخانەی نێودەوڵەتی ئەربیل یەكێكە لە پڕگەشتترین خشتەكان لە مێژووی فڕۆكەخانەكەماندا بە تێكڕای (28) گەشتی چوون لە رۆژێكدا بۆ (32) شوێنی جیاجیا لە (17) وڵاتدا".
ئەوەشی راگەیاند کە: "لە كاتی ئێستادا، رۆژانە زیاتر لە (5,000) گەشتیارمان هەیە. بە دڵنیاییەوە، ئەم زیادبوونە لە ژمارەی گەشتیاران و هێڵە ئاسمانییەكان فشار دەخاتە سەر ژێرخانی فڕۆكەخانەكەمان، بەڵام لە هەمان كاتدا، من خۆشحاڵم كە پێتان رابگەیێنم کە ژمارەیەك پڕۆژەی بەرەوپێشبردنی فڕۆكەخانە کە لە بەرژەوەندی گەشتیاران دان لە جێبەجێكردن دان، لەوانەش؛ دابینكردنی ژمارەیەك پاسی نوێ بۆ گواستنەوەی گەشتیاران لەناو فڕۆكەخانە، نۆژەنكردنەوەی توالێتەکانی ناو تێرمیناڵ، كردنەوەی کافیتریای نوێ و خزمەتگوزاری هەڵگرتن و گواستنەوەی جانتای گەشتیاران. لە چەند هەفتەی داهاتوودا، سیستەمێكی نوێی زانیاری گەشتەكان و سیستەمێكی فراوانی كات بەسەربردنی گەشتیاران لە تێڕمیناڵ دەكەونە كار و هەروەها دەست بە فراوانتركردنی بازاڕی ئازاد (Duty Free) دەكرێت".
لە كۆتاییشدا، وتی :"دووبارە بەخێرهاتنی هێڵی ئاسمانی فری بێرد (Free Bird) دەكەم. ئەنجامدانی گەشتی راستەوخۆ لە/بۆ ئایندهۆڤن و کۆڵۆن و ئەنتاڵیا بە دەستكەوتێكی گەورە بۆ هەرێم دەبینم و كاتەكانی چوونی ئەم گەشتانە باشترین كاتن بەتایبەتی بۆ ئەو خێزانانەی كە منداڵیان لەگەڵە".
فایل No File
  List

په‌یوه‌ندی كردن